27M

Onte, como no resto do país, a cidadanía de Valga acudiu as urnas para elexir alcalde ou alcaldesa e concelleiras/os para os vindeiros catro anos.
A participación foi do 66.24% polo que a porcentaxe de abstención se situou no 33.76% e o reparto de concelleiros/as foi moi disputado, xa que houbo que esperar ao reconto na última mesa para saber se o PP aumentaba un ou o PSOE-PSG pasaba de un a dous. Finalmente, parece que a balanza se inclinou do lado deste último.
A configuración, xa que logo quedaría do seguinte xeito: PP 10, PSOE-PSG 2 e BNG. O PP volta a conseguir maioria absoluta.

NORABOA A CIDADANÍA DE VALGA POR EXERCER O SEU DEREITO AO VOTO OU POR NON EXERCELO.
É tan válida unha opción coma a outra?
Participa no noso debate aportando a túa opinión ao respecto.

ASMIVALU COAS NOVAS TECNOLOXÍAS.

As rapazas e rapaces de Asmivalu están aprendendo a usar o ordenador mediante xogos didácticos. Deste xeito, preténdese:

• Dar a coñecer as novas tecnoloxías a persoas con discapacidade mental.
• Aprender sinxelas rutinas informáticas.
• Divertirse de forma paralela á aprendizaxe.
• Saber acender e apagar o ordenador.
• Acadar un manexo fluído do rato.

Esta actividade está a ser desenvolvida pola dinamizadora da Rede de Dinamización da Sociedade da Información.

DÍA DAS LETRAS GALEGAS

Valga celebra o Día das Letras Galegas.
Hoxe, todas as persoas que pasen polas oficinas do Concello terán un agasallo: un libro.
Mañá terá lugar a inaguración de dúas exposicións:

• "Vida e Obra de María Mariño"
• "Así ven as rapazas e rapaces de Valga o Día das Letras Galegas.

A continuación, as 20:30 horas terá lugar a actuación das Pandereteiras de Moldes, as que xa tivemos ocasión de escoitar o día da sementeira.
Despois, o grupo da Escola Artística de Cuntis levará a escena a obra de teatro "A nosa vila".

O sábado será xornada de portas abertas no ximnasio de Beiro. ¿como, que non te enteradas de que había un ximnasio? pois si, o sábado teremos ocasión de coñecer as súas instalacións.

MARÍA MARIÑO

Este ano, o día das Letras Galegas está adicado a poetisa María Mariño, autora de obras como "Palabra no tempo" ou "Verba que comeza".
Como homenaxe, desde este espazo queremos achegar un dos seus poemas:

Libro 1. "¡Inda vou na misma meniña..." (Palabra no tempo)

¡Inda vou na misma meniña
aquela que fogueaba sin leito!

¡Son aquela!
¡Son aquela que no bosco
escuitaba o himno dela!

Son aquela mañanciña,
entre orballo das rosas,
enre area de sendeiros,
onde atopaba a campana.

Caladiña eu chamaba
en berros que hoxe esquezo,
cando o navío de lonxe
o meu mar cheo atracaba.

¡Son aquela!
Son aquela tarde queda
que no serán se chamaba
miña aurora sin coores
chea dun farto rebusco
que en un xordo a min chegaba.

¡Son aquela!
Son aquela pena nubra
que de mofo entrenzaba
a lonxe voz do poeta,
cando aínda non sabía
que era pra ela
o que aquela voz narraba.

¡Son aquela!
Son aquela sempre soia
que paseaba a ribeira
a ver si nela atopaba,
a ver si nela afogaba.

Eu non sei,
eu non sei son sinceira.
Eu sentía un lonxe triste,
eu sentía nel ledicia,
eu quería quedar soia,
eu quería compañía,
¡aquela que eu non sabía!

Hoxe o sol enxuga a néboa.
Os dous tecen amores.
¡Han de saber algo dela!


http://www.culturagalega.org/album/detalle.php?id=7

VOGAR.POEMA DE MARÍA MARIÑO CON MÚSICA E VOZ DE UXÍA SENLLE

SEMENTEIRA DO TRIGO

O I Festival Interxeracional segue a desenvolverse.
Hoxe, venres 11 de maio comeza a "sementeira do trigo". Actividade mediante a cal se recupera a festa e a tradición das épocas nas que se botaba o trigo.
A cita en Ferreirós (Cordeiro) a partires das 11:30 horas.
Coa sementeira do trigo preténdese que a "a mocidade coñeza e valore as vellas tradicións como patrimonio da nosa cultura".

OS PENOUCOS

A asociación cultural Os Penoucos presenta o seu programa de actividades co gallo do Día das Letras Galegas, adicado este ano a poetisa María Mariño.

PROGRAMA DE ACTIVIDADES.

• Curtametraxes. Casa de cultura de Ponte Valga. Día 17, ás 21.30 horas dirixida ao público adulto. Sábado 19, as 17.00 horas será para as nenas e os nenos.
• Xogos Populares. Día 17, as 16.00 horas no campo de fútbol vello de Baño. Para nenos e nenas.
• Certame literario-artístico Xosé Lois Míguez. Sábado 19, ás 18.00. Entrega de premios. Ao rematar terá lugar un recital poético. As persoas interesadas en participar neste certame teñen ata o día 15 para presentar os seus traballos. Inclúe dúas modalidades: infantil e libre (a partir de 12 anos)
• Teatro. Domingo 20, ás 19.00 na Casa de Cultura. O grupo Teatro do Improvisto leva a escena Cando Harry atopou a Sally.

Fonte: La Voz de Galicia, martes 8 de maio. Edición Arousa.

OBRADOIRO DE MANUALIDADES

AXENTIVA está a desenvolver ,en colaboración coa Deputación de Pontevedra, un obradoiro de manualidades.
O único requisito para asistir é ser socio/a da asociación e por suposto, ter gañas de aprender e facer cousas novas.
CREAR,
APRENDER,
COMPARTIR, todo iso e todo o que vos queirades.

AFOGADOS NO DESERTO

Esta semana unha recomendación,
a exposición fotográfica sobre o Sahara de Gabriel Tizón.
Podedela visitar no Centro Comarcal do Salnés do 2 ao 15 de maio.
"Este traballo está adicado a toda a xente que axuda no terceiro mundo dunha maneira anónima, e por suposto, aos nosos irmáns, os saharauís, pola impresionante acollida que me fixeron".
Gabriel Tizón (fotógrafo autor da mostra)